Ideal Photo Studio – Edo

Vb’ọghe emwa ni bun vbe or’Ẹdo n’iran ya laa owa Isey’ama n’kere ọrọ okaro n’iran ya vbaa omwa n’ọ gue inwina Isey’ama. Emwa eso ghi hoo ni iran n’segbe iran kevbe emwi igho obioye ni rian mwẹ y’ama–emwi ọghọ ọghe ugie isasegbe, emọtosaiko kẹvbe okotọ. Emwa ọvbehe hoo ne Solomon Alọngẹ ye emadogua ọkpa ọghe ughegbe ne ya ru isey’ama, ọnren avbe ekọtin ni mwẹẹ ama ne Ọba Victoria oghe Britain na s’egbe y’ama ke avbe amazẹ n’a y’emwi haan egbe kevbe emwi ose ọvbehe n’a viọ lele iran egbe vbe ne ẹgogo ye oboobo, eb’inyẹ, ẹkpẹtin ihuan n’ọ lẹgaa debaa avbẹ emwi ayawewe.

Owa Isey’ama n’kere na do gha re ako ẹnwaẹ vbe irẹnmwi ne edọmwadẹ emwa na rhiemaa emwira ọmwa n’iran khi vb’odẹ ẹmwẹ ẹwu, imwamw’egbe, emwi ọghọ ra emwi ose, kevbẹ emwa n’iran gha debaa s’egbe y’ama. Alọngẹ viọ emwi ughughan vbene ekọtin ye, emwi n’a ya haan otọwa, n’a ya haan owa ke emwi ose owa isey’ama n’emwa n’ọ s’iran egbe y’ama vbe gha guiran nwina n’iran setin miẹ aro ama ne iran hoo. Ọkpa vbẹ emwi n’emwa mobo gha mu egbe kọ ke ghi rẹ igagan erhan ne ọmatan s’ẹkun n’emwa ni segbe y’ama vbokho ra totana nyaa vbe odẹ n’orhirhi khọ iran.

Alongẹ vbe se y’ama emwi ne ọ kaan ẹvbo kevbe agbọn ivbi-ẹvbo or’Ẹdo. keukpo 1930 kpaa, avbe ọkae olotu ni re da dẹẹ kẹke avbẹ otu iguẹsẹ, avbe ọduẹki, avbe owugamwẹ, avbe ow’ebe ke avbe ugha ni khua ni kaan emwi ugughan n’a ru er’ọ ghara nwina nyaa. Irọẹn, ke n’ọ ye ukpo ọgban mwina lele rẹ, ighe Arasọmwa, vbe zẹdia gha ye ikẹkẹ mu okhian ya gha s’emwa y’ama vbe ne otu ivbi-esuku ye, otu ivbi-ẹvbo, emwa isasegbe kẹke otu avbe emitin kevbe wẹre n’ran se ugie ughughan y’ama katakate, ugie orọnmwẹ ọghe ed’ubiẹmwẹ debaa ne a ya ladian vbẹ ow’ebe. Avbẹ emwi ighobioye n’ẹ i lahin orhion ree ẹre avbe ama ọghe ẹgbẹe (ẹgbẹre) na khin vbe ẹdagbọn emwa ni rre or’Ẹdo.